Die 2014 TuksChallenge stoeitoernooi wat onlangs in die Rembrandtsaal op Tukkies se sportkampus aangebied is, was ‘n reuse sukses.

Die toernooi is ondersteun deur 29 klubs en meer as 400 stoeiers het ingeskryf om deel te neem. Dit beteken dat hierdie toernooi amptelik die grootste klubtoernooi in die land is.

Top stoeiers soos Requir van der Merwe, wat die afgelope vyf jaar in Amerika woon, het ook deelgeneem. Hy het gesorg vir aanskoulike stoei en hy het in beide sy afdelings goud ingepalm.
Die sewe stoeimatte het gewriemel van talentvolle stoeiers. Meer as 160 jong stoeiertjies het dit verbete uitgespook om te wys watter tegnieke hulle al baasgeraak het. Ouer stoeiers het hulle ook baie goed van hulle taak gekwyt, terwyl die seniors en meesters ook bewys het dat stoei ‘n sport vir jonk en oud is.
Die stoei was van hoogstaande gehalte, maar die tuis-klub (TuksStoei) het uiteindelik genoeg gedoen om met die spantrofee huis toe te gaan.