Tukkies se vroue sewesrugbyspan het dit wéér gedoen. Dié span het hul soveelste trofee in die buiteland verower, waar hulle as klubspan teen internasionale teenstand in ’n internasionale toernooi moes kompeteer.

Die Tukkies vroue het verlede week aan die Stanislas Sewestoernooi in Nancy in Frankryk deelgeneem. Nadat hulle in die uitspeel fase met die nasionale span van België (12-0), asook ’n Franse streekspan (24-0) en ’n uitnodigingspan van Nancy (26-0) afgereken het, het hulle ongelukkig teen Hongarye (10-19) verloor.

Hulle het steeds gekwalifiseer vir die kwarteindrondte van die toernooi, maar ongelukkig het hulle in dié wedstryd naelskraaps (7-10) teen die nasionale span van Romenië verloor.

Daarna het die Tuks vroue gekwalifiseer om in die plaatkompetisie te speel.  Hulle het Noorweë in die halfeindrondte van die plaatkompetisie met 14-0 geklop. In die finaal van die plaat-afdeling het hulle met Switserland afgereken (10-7) om dié trofee in te palm.

Volgens die span se afrigter, Riaan van der Merwe, was die toernooi vir sy spelers ’n besondere ervaring, aangien hulle vir die eerste keer in hul lopbane in sommige vandie wedstryde op ’n grondbaan moes speel.