Die Blou Bulle se Bulletjierugby-model is wêreldbekend en groot sterre van die spel het deur die jare hul eerste rugby-treë in dié formaat gegee.

Die projek met die bekende Bullejie-logo is jaarliks ’n groot trekpleister vir beginner-rugbyspelertjies en hul ouers. Amptelike Bulletjierugby-dae word jaarliks by skole en klubs aangebied, terwyl die unie se groot Bulletjiedag by Loftus Versfeld jaarliks sowat 5000 jong Bulletjies en byna dubbel soveel geesdriftige toeskouers lok.

Die Blou Bulle Rugby-Unie (BBRU) het in samewerking met hul borge besluit om die konsep van Bulletjierugby opnuut aan belangstellendes bekend te stel. Die unie nooi daarom alle ouers, asook Bulltjierugby-afrigters en skole-koördineerders na ’n loodsingsgeleentheid om meer inligting oor dié projek vir 2017 te kry.

Belangstellendes word genooi om op Woensdag 8 Februarie om 18:00 op die hoofpavijoen van Loftus Versfeld bymekaar te kom vir ’n inligtingsessie wat ’n uur sal duur.

Die bekende sportsielkundige, dr. Jannie Putter, sal belangstellendes by hierdie geleentheid toespreek oor die tema “My kind, die rugbyspeler”.

Daarna sal sake soos die Bulletjierugby jaarprogram en Bulletjierugby bestuur, die format van Bulletjierugby as spel en die afrigtingsbeginsels daarvan ook bespreek word.

Uitrusting, toerusting en Bulletjie-plakkate sal ook aan deelnemende skole voorsien word. Parkering sal beskikbaar wees agter die suid-paviljoen, vanaf die Lynwoodweg ingang.

Vir meer besonderhede oor die Bulletjierugby konsep kan die BBRU se webblad by www.thebulls.co.za of die amptelike Bulletjierugby Facebook blad besoek word.

Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 072 435 7717.