Na baie jare waartydens puik rugbyspelers groot frustrasie moes beleef om hulself as top spelers te vestig wanneer hulle nié vir die ‘regte’ skool uitgedraf het en dus nie ‘n behoorlike kans in provinsiale skolespanne gekry het nie, is dinge stadig maar seker besig om te verander.

Een van die spelers wat deesdae as inspirasie kan dien vir skoolseuns wat glo dat hulle aan die “verkeerde kant van die stad” probeer om hulself te laat geld, is Ruan Nortjé, wat onlangs op 20-jarige ouderdom sy debuut in die Blou Bulle se Curriebeker span op slot gemaak het.

Nortjé het ná sy laerskooldae by Laerskool Tuine sy skoolloopbaan by Hoërskool Wonderboom voortgesit.

Reeds in dié skool se junior spanne het Nortjé uitgestaan as begaafde speler en op o.16 vlak haal hy die Blou Bulle se B-span in die proewe vir die Grand Khomo toernooi.

Met hom as deel van Wonderboom se eerstespan doen die span besonder goed in die Blou Bulle se Stadsbeker liga en ná puik spel vir die Wonnies se Tiere haal Nortjé die Blou Bulle se Akademie span in sy matriekjaar.

By die nasionale Akademieweek speel hy sulke skitterende rugby dat die Blou Bulle se werwingspersoneel hom bo die Cravenweek slotte verkies om ‘n junior kontrak aan te bied. Hierdie vertroue in hom word korrek bewys toe hy aan die einde van 2017 as die Bulle se o.19 Speler van die Jaar aangewys word.

Ook die nasionale o.20 bestuur het van Nortjé kennis geneem, want hy word vroeër vanjaar na die Junior Bokkies se proewe genooi. Daarna word hy die enigste Bloubul speler wat verkies word as deel van dié span om Suid-Afrika by die o.20 wêrelbeker te verteenwoordig.

By die wêrelbeker toernooi in Frankryk was Nortjé een van die Junior Springbokke se sterre. Hulle het ongelukkig met een punt in die halfeindsrtyd teen Engeland verloor, maar in die uitspeelwedstryd om die brondmedalje klop die Jong Bokkies Nieu-Seeland met ‘n telling van 40-30.

Nortjé het so goed vertoon in die o.20 wêreldbeker toernooi dat hy die enigste speler uit die Junior Bokkies se span word om later as slot ingesluit te word by die amptelike “Span van die Toernooi”, wat deur kenners aangewys is.

Die Blou Bulle se Curriebeker afrigter, Pote Human, het reeds by verskeie geleenthede laat blyk dat Nortjé volgens hom ‘n groot rugbytoekoms het. Hoewel hy ‘n maand voor die afskop van die  Curriebeker toernooi eers 20 jaar oud geword het, is hy reeds een van die Blou Bulle se uitblinkers.

Nortjé is nie net ‘n bewys dat die Blou Bulle se beroemde slotfabriek steeds produktief is nie, maar ook dat toewyding en harde werk sukses kan bring vir enige rugbyspeler – al speel hy nie in die top skoleligas vir een van die meer prominente skole nie.

Vir jou daaglikse gratis gemeenskapsnuus, besoek Rekord se webwerwe: