Die verdedigende kampioen, Naka Bulle, is ná die afgelope naweek se Castle Carltonbeker aksie die enigste onoorwonne span in die liga, nadat die Grizzlies van Tuine hul eerste nederlaag van die seisoen gely het.

– Centurion het vriend en vyand verras deur die Grizzlies op hul tuisveld in Tuine met 36-28 te klop.

Daarmee het Jacques Potgieter se manne uit die suide wraak geneem, nadat Grizzlies hulle in Meimaand in ’n spannende stryd met een punt geklop het toe die twee spanne in Centurion slaags geraak het.

Die besoekers het Saterdag met ’n kombinasie van oorheersing deur hul voorspelers en positiewe rugby agterlangs hul teenstanders verras.

Na ’n wipplank-eerste helfte, waatydens elke span drie keer agter die doellyn gaan kuier het, was Centurion met 25-21 voor toe die twee spanne kante moes ruil.

Die tweede helfte was heelwat taaier en elke span het nog een keer gaan druk. Die verskil was egter die skopskoene van Centurion se losskakel, Cornel Korff, en heelagter Ronan McCrimmon, wat tussen hulle 12 punte met strafdoele aangeteken het.

Terwyl die besoekers se loskopstut, Theo Jordaan, ’n uitstekende vertoning gelewer het in die skrums én met sy algemene spel, het die 19-jarige McCrimmon, weer gewys dat hy ’n ster op hierdie vlak gaan word en ook ’n aanwins vir enige junior provinsiale span sal wees. Dié jongman is groot, sterk en vinnig en sy afgeronde vertonings is weekliks goud werd vir Centurion.

– Harlequins het weliswaar eerste punte aangeteken in ’n tuiswedstryd teen Naka Bulle toe heelagter Jeandré Balie ver genael het vir sy drie, maar toe die besoekers se woelige flank, Eckard Boshoff, kort daarna oordryf vir sy drie wat sake sou gelykmaak, het die manne van die Moot nie weer teruggekyk nie.

Teen rustyd het hulle reeds drie keer gaan druk om met 21-13 voor te loop.

Nog vyf drieë, wat ’n strafdrie insluit, sou in die tweede skof volg, terwyl die tuisspan slegs nog twee doele en ’n strafdoel kon byvoeg. Dit het die eindtelling op 56-30 in Naka Bulle se guns laat staan, terwyl dit ook beteken dat Quins geen ligapunte uit die stryd kon verdien nie.

Dis sekerlik nie onbillik om Harlequins as die teleurstelling van die seisoen te beskryf nie. Dié span speel nie swak rugby nie en het ’n paar naelskraapse uitslae beleef, maar as hul personeel op die veld in ag geneem word, moes hulle baie beter gevaar het. Daar is heelwat potensiële sterre in die Blokkiestruie se geledere, maar die manne het Saterdag hul vyfde agtereenvolgende nederlaag gely.

Quins het tans slegs drie ligapunte op die punteleer na vyf wedstryde en sal dus al drie hul oorblywende wedstryde moet wen én moet hoop dat Centurion (13 punte) of Tuks (12 punte) geen verdere ligapunte ontvang as hulle onder die top vier wil eindig nie.

– Dit is tans nog onseker of daar vanjaar halfeindstryde gespeel gaan word en of die twee top spanne direk vir ’n eindstryd sal kwalifiseer.

– Tuks bied hierdie week die USSA toernooi op hul tuisveld in Hatfield aan en sal dus vir nog ’n week nie deel van die Carltonbeker aksie wees nie.

Tuks se bestuur het twee weke gelede die ongekende stap geneem om al drie hul spanne te onttrek van hul ligaverpligtinge teen Naka Bulle om dus vrywillig ligapunte af te staan. Té veel beserings in aanloop na die USSA toernooi is as hoofrede aangegee. Hulle het nie net aan die verdedigende kampioen se drie spanne elk vyf ligapunte op ’n skinkbord gegee nie, maar volgens die kompetisiereëls ook twee strafpunte op die punteleer afgestaan weens dié ongewone belsuit.

Het jy dalk meer inligting rakende dié storie? Stuur gerus vir ons ‘n epos na bennittb@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram blaaie.