POLOKWANE – Oom Willem Vos het in 2005 by Oosskool aangesluit waar hy vir drie jaar betrokke was by die skool se instandhoudingswerk. In 2009 het hy ‘n ander aanbod gekry, maar twee jaar later teruggekom Oosskool toe waar hy steeds is.
“Toe die destydse skoolhoof my nader om terug te kom Oosskool toe, het ek die kans aangegryp. Ek geniet dit vreeslik baie hier en ek ken die skool soos die palm van my hand.”
Hy vertel dat hy altyd besig is met iets en dat hy nooit stilsit nie. As dit nie gewone instandhouding is nie, bou hy borde uit hout vir die personeelkamer of doen hy staalwerk.
Hy vertel dat hy die leerders se geselskap baie geniet en dat die skool soos een groot familie vir hom is.
“Ek werk dwarsdeur die skoolvakansies om instandhoudingswerk te doen wat die klasse kan ontwrig. Die laaste week van die skoolvakansie is gewoonlik die besigste tyd vir ons aangesien ons dan klasse moet skoonmaak en die skool gereed maak kry vir die volgende kwartaal. Soms moet ek tot laat in die aande hier wees as daar funksies by die skool gehou word soos die onlangse Adam-konsert.”
Oom Willem vertel dat hy getroud is met Helena en dat hulle drie kinders het en drie kleinkinders. In sy vrye tyd hou hy homself besig met handwerk en om tyd saam met sy familie te spandeer.
Hy sê dat hy nog ver van aftree is en sal aanbly vir solank as menslik moontlik en sy gesondheid hom toelaat. “Ek sal met gereedskap in my hande, hard aan die werk doodgaan as ek die keuse het,” skerts hy.
