Kruinies vier Stigtingsdag met speletjies, sport

‘n Pizza-eet- en Coke-drinkkompetisie, fietsry en ‘n uitdagende hindernisbaan was Vrydag van die bedrywighede van Curro Heuwelkruin se Stigtingsdagvieringe op die skoolterrein wat Saterdag met ‘n rugby- en netbalkragmeting teen Hoërskool Ben Vors-ter as hoogtepunt afgesluit is.
Vrydag het leerders in hul onderskeie grade mekaar die stryd aangesê om te kyk wie ‘n sny pizza die vinnigste kan eet, ‘n glas koeldrank die vinnigste kan wegsluk en tussen punte die vinnigste kan hardloop of fietsry om by die hindernisbaan uit te kom. Ouers en onderwysers het mekaar op die hokkiebaan in ‘n rolbalwedstryd aangedurf terwyl die potjies ook rustig in die potjiekos-kompetisie geprut het.
Saterdag se wedstryde het gemengde welslae opgelewer.
Op die rugbyveld het die o.10-span 29-10 teen Curro Secunda gewen terwyl die o.13-span 0-17 teen Laerskool Messina verloor het. Na afloop van ‘n taai wedstryd tussen die o.17-spanne was die telling steeds gelykop met 28 elk terwyl Kruinies se eerstespan met ‘n 12-38 loesing tevrede moes wees.
Op die netbalbaan het die Kruinies teen die Vossies en Hoërskool Nylstroom te staan gekom, maar uitslae was nie teen druktyd beskikbaar nie.

RC Myburgh
>>rc.observer@gmail.com