Senior burgers leer meer oor begrafnisvoordele

Inwoners van die Vergeet My Nie Behuisingsentrum van die SAVF Polokwane het Vrydag­oggend hartlik saamgesing en selfs ‘n paar danspassies uitgevoer tydens ‘n besoek van tenoor, Chris Coetzer en sy student, Greunen.
Die geleentheid was deel van begrafnis­diens, Avbob se landwye toer waartydens senior burgers oor begrafnisvoordele ingelig word en geleentheid kry om met plaaslike verteenwoordigers kennis te maak.
Louis Lewis, skakelbeampte vir senior bur­gers van Avbob het dokumentebundels aan die gaste uitgedeel en verduidelik dat dit nuttig vir naasbestaandes is wanneer reëlings ten tyde van ‘n sterfgeval of ernstige siekte getref moet word. Die bundels bevat onder andere ‘n lewende testament en belangrike inligting aangaande ‘n persoon se wense oor kwessies soos post mortem-besluite.
Coetzer het ‘n paar lewenswyshede met die seniors gedeel en hul gemotiveer om vir elke dag te leef en dankbaar te wees vir die seëninge wat hulle ontvang ten spyte van siekte en beproewinge.
Die gehoor was aan sy voete toe hy die verrigtinge afgesluit het met ‘You raise me up’ en ‘Jerusalem’ en het hartlik saamgesing toe hy en Greunen liedjies uit die FAK-sangbundel gesing het.

Storie en foto: BARRY VILJOEN
>>barryv.observer@gmail.com

Hooffoto: Jong sanger, Greunen (voor) met Louis Lewis, skakelbeampte vir senior bur­gers van Avbob, Chris Coetzer, Dawie Lee, bestuurder van SAVF Polo­kwane en Sanet de Beer, bestuur­der van Avbob Polokwane.