Rekenaarwinkel weer beroof
Daar is Dinsdagaand weer by die rekenaarwinkel van Willie van Wyk, The Computer Shop ingebreek, die inbrekers het glo toegang deur die dak verkry.
MOKOPANE – Van Wyk sê hy het dadelik onraad vermoed toe hy sy winkel Dinsdagoggend oopsluit en die alarm nie af gaan nie. “Daar was totale chaos gesaai in my winkel. Glasstukke het orals gelê, my vertoonkas is stukkend geslaan en die diefwering by een van die vensters was geknip en oopgebuig.”
Volgens van Wyk het die verdagtes toegang deur die dak gekry.
“Die inbrekers het ‘n gat deur die plafon geslaan by die alarmboks en die alarm ontkoppel en uitgeruk.
Hulle het weggekom met baie voorraad waaronder skootrekenaars, hardeskywe, sentrale verwerkingseenhede en rekenaarparte.
Die voorraad het hulle vermoedelik deur ‘n klein venstertjie aangegee aan iemand wat buite die gebou gestaan het,” sê van Wyk.
Van Wyk is moedeloos oor die misdade. Dit is die tweede keer wat daar by sy winkel inbreek word in vier maande se tyd.
Hy sê daar is probleme met veiligheid. “Die veiligheidshek langs die gebou werk nie en enige persoon kan in en uit beweeg. In die aand is dit ook pikdonker en die gloeilampe word net eenvoudig verwyder sodra dit vervang word.”
Die waarde van die voorraad wat gebuit is, sal Van Wyk eers kan beraam na hy ‘n volledige voorraadopname gedoen het.
redaksie.bosveld@nmgroup.co.za
