POLOKWANE – ‘n Opsigter van een van die stad se skuilings vir armes is verlede week gearresteer vir die seksuele aanranding van ‘n minderjarige meisie.
Die 59-jarige man, wie se naam om regsredes weerhou word, is verlede Donderdag gearresteer op aanklagte van seksuele aanranding van ‘n 15-jarige meisie.
Die man is ook die eienaar van die perseel vanwaar die skuiling, waar sowat 16 mense gehuisves word, bedryf word.
Volgens die polisiebeampte wat op die toneel was ten tyde van die arrestasie, is die saak reeds vroëer die jaar aanhandig gemaak en na ‘n lang ondersoek is die man verlede week gearresteer.
Die dossier is aan die Direktoraat van Openbare Vervolging gestuur. Volgens Lt. Kol. Moatshe Ngoepe, die polisie se Provinsiale Woordvoerder kom die saak voor op 20 Oktober.
