LIMPOPO – Volgens lt. kol. Moatshe Ngoepe, Woordvoerder van die SAPD, het drie verdagtes op die plaas toegeslaan en op Bertus Henrico geskiet.
“Die boer is in die skouer geskiet en het ‘n skraapwond in die nek opgedoen. Die boer het terug geskiet en een verdagtes is vermoedelik gewond.”
Volgens Kobus de Lange, ‘n boer van die omgewing, is Waterberg Veiligheid, Dorset Gemeenskapspolisiërings Forum, Heritage Protect Group, Vaalwater GPF, Welgevonde GPF, Waterberg Rangers en SAPD op die toneel en volg hulle spore van die verdagtes.
De Lange sê: “Die verdagtes het ‘n .243 geweer gesteel en was gewapen met handwapens. Die verdagtes word deur die boere beskryf as twee lang mans en ‘n korter een met khaki langbroeke aan”.
Henrico is in ‘n hospitaal opgeneem en geopereer om die koeël in sy skouer te verwyder.
Tydens die aanval is sy vrou se arm gebreek. Albei is gestabiliseer en dit is nie bekend of sy vrou ook in die hospital opgeneem is nie.
redaksie.bosvelder@nmgroup.co.za
