Eeufeeshuis vier dag van liefde
By Eeufeeshuis word inwoners dikwels nie deur geliefdes bederf nie, maar gelukkig wel deur die personeel of mense in die gemeenskap.
POLOKWANE – Spesiale dae soos Valentynsdag, Moedersdag en Vadersdag is ‘n geleentheid vir mense om hulle geliefdes te bederf.
By Eeufeeshuis word inwoners dikwels nie deur geliefdes bederf nie, maar gelukkig wel deur die personeel of mense in die gemeenskap. Die inwoners en personeel het dus op Maandag, wat Valentynsdag was, die geleentheid gebruik om hulle mooiste rooi klere aan te trek en by die werkswinkel aan te meld. Elke inwoner was genooi vir die Valentynspartytjie en niemand het hiérdie geleentheid vir pret misgeloop nie.
Die werkswinkel word gebruik deur die inwoners en dagbesoekers om kreatiewe aktiwiteite aan te pak, en elke dag kom almal hier bymekaar vir handwerk en lekker geselskap.
Maandag was egter spesiaal en in plaas van werk, het die inwoners saam gekuier, gedans en speletjies gespeel.
“Die speletjies het gewissel van bal balans aktiwiteite, touspring-kompetisies en musical chairs,” vertel Rita Groenewald, die persoonlike assistent van die APD direkteur. Met uitbundige lagbuie en vrolike krete het die inwoners deelgeneem aan al die aktiwiteite. Elkeen het ook ‘n kolwyntjie as bederf ontvang waaraan hulle heerlik gesmul het.
