POLOKWANE – Vanaf die eerste oomblik wat ‘n vrou uitvind sy is swanger, spring ‘n hele beplanningsproses in werking.

Eers is daar die datum wanneer die paartjie die nuwe mens gaan ontmoet, dan die geslag, dan ‘n naam en voor hulle oë uitvee, is die pienkvoet daar.

Kort voor lank tree daar egter vir sommige ma’s ‘n nuwe fase in – een waarin hulle alleen by die huis is met baba, en emosies neem oor.

Talle vroue raak huilerig en voel terneurgedruk, geïrriteerd, en sukkel selfs om te slaap – terwyl Mamma voor Baba se geboorte altyd mev. Sonskyn was.

Volgens Melanie Botha, verpleegster en vroedvrou wat spesialiseer in psigiatrie en eienaar van First Steps Clinic, wissel die ervaring hiervan van een ma tot ‘n ander.

“Party ma’s ervaar post-natale depressie eers wanneer hulle terugkeer werk toe. Die simptome gaan meestal na ‘n paar weke weg, maar wanneer dit aanhou, kan dit problematies raak.”

Sy verduidelik dat simptome soos aanhoudend huil, geïrriteerdheid, slegte slaappatrone en ‘n gebrekkige eetlus kan dui op nageboortedepressie.

“Wisselende hormone veroorsaak dat party ma’s meer kwesbaar is vir depressie, maar daar kan ook psigososiale redes wees daarvoor.”

Dié redes sluit in:

• As jy ‘n slegte verhouding met jou eie ouers het.
• Wanneer die verhouding met die pa van die kind nie goed is nie.
• Wanneer jy voor jou swangerskap reeds met jou geestesgesondheid gesukkel het.
• Wanneer jy alles rondom jou wil beheer.
• Wanneer nabye familie ver woon.
• Gebrek aan ‘n goeie ondersteuingsnetwerk.

“‘n Nuwe ma soek gewoonlik raad van haar eie ma. Wanneer dié nie beskikbaar is nie, kan die taak van ‘n nuwe ma oorweldigend raak. Nageboortedepressie is ook sigbaar onder vroue wat sukkel om beheer oor te gee. Baie vroue wil graag die perfekte vrou met die perfekte verhoudings wees en is geneig om nie maklik raad te vra of aanvaar nie.”

Kry hulp as die volgende simptome vir meer as twee weke aanwesig is:

• Verandering in jou eetlus.
• Slegte slaappatroon.
• Konsentrasieprobleme en irritasie.
• Probleme met besluitneming.
• Negatiewe gedagtes oor moederskap.
• Huilerigheid.
• Gedagtes aan dood of selfdood.

“Dit is baie belangrik om hulp te kry wanneer jy hierdie simptome ervaar. Gaan praat met jou dokter of kliniek suster, of met ‘n goeie vriendin.  Jy is nie alleen nie.”