POLOKWANE – Bella die Duitse Herdershond het onlangs vir baie trane van hartseer én toe blydskap, gesorg.

Dié driejarige en haar Huskyboetie, Hutcie, het voorverlede Woensdagnag by hulle huis se hek uitgeglip en die strate begin verken.

Hulle mens-ouboet, Zander, het vroeg die oggend gesien die hek staan oop en besef die honde is weg. Hy en sy ma, Lena-Marie Swanepoel, het onmiddellik begin soek en nie lank nie of hulle kry vir Hutcie. Maar van Bella was daar geen teken.

Lena-Marie het op sosiale media begin vra mense moet help soek na Bella. Die gesin treur nog oor hulle dogter en suster, Odine, wat laat verlede jaar in ‘n botsing omgekom het.

Bella was haar hond en Lena-Marie sien elke keer wat sy na Bella kyk, vir Odine in Bella se oë.

Die nuus dat Bella weg is, het soos ‘n veldbrand versprei en selfs mense wat glad nie vir Bella of haar mense ken nie, het help soek.

Bella se pa, Jacques, het selfs ‘n beloning van R5 000 aangebied vir die persoon wat haar kon opspoor.

Bella is in ‘n stadium op die koppie by Sterpark gewaar, en diere-aktivis Adele Heinlein, het begin fokus op daardie area. Ook sy het op sosiale media begin versoek dat inwoners met die soektog help. Adele, en Tammey Erasmus het vir ure gery opsoek na Bella en ook ‘n vanghok opgestel.

Die beloning het intussen opgeskuif na R10 000 in die hoop dat, sou iemand vir Bella by hulle het, hulle haar sou terugbesorg.

Jaco en Melanie van Eeden het met hulle hommeltuig tot laat die Vrydagnag oor die koppie gevlieg en Fred du Plooy het weer deur die dag met sy hommeltuig help soek. Leon de Villiers se vliegtuig is ook ingespan.

Maandagmiddag net na 14:00 lui Lena-Marie se foon.

Haar hoop om weer vir Bella te kry was teen die tyd op, maar toe ‘n jong pa Arno Coetzee vir haar sê hy is amper doodseker hy het Bella in sig, het sy in haar motor gespring en gery.

“Hy kon nie vir my sê presies waar hy en Bella is nie, en het vir my die GPS-koördinate gestuur. In Taurusstraat sien ek uiteindelik ‘n rooi motor. Dit was Arno en toe, in ‘n oop erf tussen twee huise, sien ek vir Bella in die voetpad lê.”

Lena-Marie se vreugde was groot en toe sy na Bella roep en dié kom baie opgewonde op haar afgestorm, kon sy die trane nie keer nie. Bella is geneem om gebad te word en daarna is sy huis toe waar sy op Odine se plek op die bank gaan lê het.

“Ons glo dit was die krag van die gemeenskap wat vir Bella gekry het. Van boemelaar tot petroljoggie, almal het help soek. Mr. Delivery het van die pamflette op hulle motorfiets-houers geplak om sodoende die woord te versprei. Ons dink mense het so saamgestaan, juis omdat dit Odine se hond was. Ons het selfs spoorsny-honde gekry om haar te help soek. Dit was ongelooflik om te sien hoe mense kan saamstaan. Baie mense het help bid. Dit is wonderlik om te ervaar,” sê Jacques.

Lena-Marie sê Arno wou eers nie die beloning aanvaar nie, en het net vir petrol gevra.

“Ek het aangedring dat hy sy rekeningnommer vir my gee sodat ek die geld vir hom kon oorbetaal. Dis toe dat hy sê hy kan nou vir die eerste keer vir sy dogtertjie ‘n partytjie hou en ‘n geskenk koop. Ons kyk ook of ons nie vir sy vrou werk kan kry nie. Iets goed het beslis uit Bella se storie gekom. Nie net kon die gemeenskap saamstaan nie, maar Arno en sy gesin het ook gebaat,” sê Lena-Marie dankbaar.

Lees meer oor Bella in die Polokwane Observer.