POLOKWANE – Alhoewel Limpopo se winters nie gewoonlik bestaan uit grys, nat en koue dae nie, is die son tog maar flouer deesdae en sny die wind steeds om die hoeke van die huis.

Winter is ook die tyd wanneer talle mense se gemoedstoestand ‘n knou beleef.

Lesers wat nie noodwendig as depressief geklassifiseer is nie, voel skielik teneergedruk of negatief. Ander, wat die depressieduiwel goed ken, se simptome vererger egter.

Volgens voorligtingsielkundige Elmarie Pieterse, is hierdie verskynsel nie vreemd nie.

“Volgens navorsers word hierdie soort depressie seisoenale affektiewe versteuring (SAD) genoem. Hierdie soort depressie het beslis ‘n seisoenale patroon.”

Sy verduidelik dat dié soort gevoel jaarliks op min of meer dieselfde tyd kop uitsteek, en dit is gewoonlik in die wintermaande.

“Die korter dae en verminderde sonlig speel ‘n groot rol aangesien dit verbind kan word met ‘n chemiese verandering in die brein.

“‘n Ander rede kan die hoeveelheid melatonien wees wat deur die liggaam gemaak word. Wanneer dit donker is, word meer melatonien geproduseer, en dus word daar meer van hierdie slaaphormoon vrygestel. Dit op sy beurt veroorsaak dat ‘n mens meer wil slaap.”

Simptome van seisoenale depressie is verminderde motivering, en selfs om net na bitter min uit te sien. Om soggens op te staan raak moeiliker en die persoon voel dikwels deur die loop van die dag uitgeput.

Behandeling behels onder andere ligterapie – waar ‘n pasiënt voor ‘n helder lig moet sit elke oggend sodra hulle wakker word.

Kognitiewe gedragsterapie word ook gebruik vir die behandeling van depressive, sluit Pieterse af.