POLOKWANE – Behalwe vir sport is musiek sekerlik die een manier om mense bymekaar te bring en dis presies wat Saterdagaand by Pietersburg Laerskool gebeur het, toe die PLS Ondersteunersklub ‘n aand gevul met musiek, lag en dans aangebied het.

“Dié aand is aangebied om geld in te samel vir leerders wat goed vaar in sport, maar nie die nodige finansies het om op toer saam met die res van die span te gaan nie. Met hierdie geld kan die kinders saam met hulle maats toer en dit ewe veel geniet,” het Reynard Swanepoel van die Ondersteunersklub gesê.

The Boombox Musical Game Show het die program hanteer en afdelings waarin die deelnemers deel geneem het was die herkenning van plaaslike talent, die herkenning van die titel van die liedjie, raai die dekade en herken die stem van die kunstenaar.

Pryse is gegee vir die beste tema, gewen deur die Seerowers, en die beste gee, gewen deur die Neons.

Ander spanne wat deelgeneem het was die Hippies, Marilyn Monroes, St. Patrick Day, Zombies, Bokke, die Bom Squad en die Sportspan.

Alhoewel daar vir elke tafel betaal is, is daar deur die loop van die aand boetes uitgedeel en sou ‘n span verkeerd antwoord, die knoppie te vinnig druk of nie bly genoeg klink as hulle wen nie, moes hulle boetes betaal. Slegs drie spanne, die Hippies, Neons en Sportspan het deurgedring na die laaste ronde. Die ander spanne het hulle by hierdie drie spanne geskaar waarna die Sportspan as wenners uit die stryd getree het.

Hierna was die aand nog nie verby nie, en is daar tot laat nog saam gedans, gelag en gekuier.

Borge vir die aand was Tha Spice, The Cube, Scafaries Slaghuis, Quick Plumbers en B & E Ice Distributors.

Daar is ongeveer R22 000 ingesamel gedurende die aand.