POLOKWANE – Bekende tenoor Chris Coetzer het verlede week in Polokwane gekuier waar hy vir ‘n groep uitgesoekte gaste opgetree het as deel van KWNorth se Red Day, ‘n geldinsamelingsprojek.

Keller Williams se Red Day is ‘n internasionale projek waar agente van dié eiendomsagentskap die eerste Donderdag in Mei gebruik om gemeenskapswerk te verrig.

Karien Jordaan, bedryfshoof by KWNorth het dit goedgedink om vir Chris te nooi om op te tree ten bate van Red Day.

“Die optrede was ongelooflik goed en ons het baie pret gehad. Ons het R32 000 ingesamel.”

Coetzer is bekend as deel van Suid-Afrika se eie Drie Tenore tesame met Phillip Kotze, Jannie Moolman en later ook Du Preez Stoltz.

Hy tree tans as solokunstenaar op.

“Ons het 16 jaar saamgesing voordat ons besluit het om eerder op ons eie te gaan. Ek self sing al sedert ek drie jaar oud is. Daar is vir my geleer dat as jy kan skree, kan jy sing.”

Hy het sy opleiding onder Gisela de Villiers gedoen.

Chris het na skool by die weermag aangesluit en daarna onderwys studeer, en later as toeragent begin werk.

Hy stig later CC Vocals Studio waar hy nie net stemopleiding gee nie, maar ook kunstenaars leer hoe om die geskikte verhoogpersoonlikheid te ontwikkel.

“Ek en my seun Bryan toer die land vol. Hy behartig die musiek en klank. As tenor-bariton sing ek enige musiek, en maak ander kunstenaars se liedjies uniek aan my.”

Hy erken ‘n musikant moet soms uit sy of haar gemaksone gaan op die verhoog, “om te wys jy is ook mens, en só onthou mense jou”

“Ek kry my inspirasie uit die gehoor uit. Een optrede sorg vir die volgende een se program.”

Lees meer oor KWNorth se Red Day in hierdie week se Polokwane Observer.