POLOKWANE – ‘n Spesiale vriendin kan jou lewe soveel makliker maak. Behalwe vir emosionele ondersteuning, kan sy ook fisies help waar nodig.

Die personeel van Ons Tuiste het Vrydag kennis gemaak met ‘n nuwe vriendin, Sara, wat spesiaal ingespan word om hulle lewens makliker te maak.

Sara Stedy is ‘n hulpmiddel wat die verpleegpersoneel help om die bedlêende bejaardes met gemak na die badkamer te neem.

Sara help ook die gebruiker om met gemak en veilig vanuit ‘n stoel op te staan.

Sara is gemik daarop om vir pasiënte wat nie baie beweeglik is nie, terwyl hulle steeds ander aksies kan uitvoer, te help.

Deur van Sara gebruik te maak, word die take van die personeel van Ons Tuiste makliker gemaak en slegs een persoon is nodig om die pasiënt te help beweeg.

Sara Stedy is ‘n geskenk vanaf die Rotary Anns Club van Pietersburg 100 aan die ouetehuis.

Toe die verpleegpersoneel die geskenk sien, was hulle kinderlik opgewonde en selfs aangedaan.

Die bestuurder by Ons Tuiste, Carin Meintjes, het hul dank namens die personeel uitgespreek.

“Dié sal almal se lewens vergemaklik, van die persooneel tot die inwoners in die verswakte sorgeenheid.”