LIMPOPO – Inwoners van Roedtan en omgewing het gejuig oor die milde reën wat die afgelope tyd uitgesak het, wat langdurige droogte teenwerk en die versengende hitte breek.

Die landbousektor het die afgelope tyd gebuk gegaan onder verskeie hittegolwe en min reën.

Foto’s en video’s is mildelik op sosiale media gedeel, waar inwoners met veral rubbereende in die water ronddryf.

Vir een egpaar, wat sowat 6km buite Roedtan woon, het die reën egter in beproewing verander.

Nie ver van hul huis nie, het die dam oorspoel en die massa water het enkeldiepte deur die huis gevloei.

“Ons het reeds vanaf 18 Desember sowat 400mm reën gemeet, wat veroorsaak dat die grond nou versadig raak en die lande kan nie meer die afvoerwater hanteer nie,” het hulle vertel.

Die egpaar was nie tuis toe die oproep deurgekom het van die water binne-in die huis nie en hulle versekeringsdiensverskaffer is ook reeds in kennis gestel.

Chris Erasmus van die Roedtan Hotel vertel tong-in-die-kies dat inwoners voor die hotel heerlik in die water baljaar het.

“Ons was baie gelukkig want die water het tot by die boonste trap gekom en toe nie verder nie, maar vir my om nou by die hotel uit te kom maak ek gebruik van ‘n trekker.”

Volgens hom het die gebied laas in 1981 vloede ondervind.

Olaff de Meyer, wat op 1 Januarie 102mm reën gemeet het – die meeste op een dag in die area – sê die reën het in twee vloede uitgesak.

“Die eerste een was so 11km ver op die Verwegpad en die tweede vloed het gekom so 20km uit op die Singlewoodpad. Dit het veroorsaak dat die lande verspoel, paaie is onbegaanbaar, soveel so dat mense vasgekeer is in hul huise en die damme en riviere vloei oor hul walle.”

Wilna Niemann vertel dat hul op die plaas net sowat 5mm reën gehad het maar weens die versadigde grond is die afvoerwater regdeur die huis gevoer.

“Dit was nogal iets om te aanskou. Dit het geklink asof ons op die strand is soos die water deur die huis loop,” vertel sy, “daar was gelukkig nie baie skade nie”.