POLOKWANE – Taal is deel van elkeen van ons se kultuur. Dit is waarin ons lag, huil, verlang en beplan. Elke taal het sy unieke idiome, van ‘n kat in die sak koop tot skouer aan die wiel sit.

Idiome maak die taal kleurvol en dit help om idees, gedagtes en emosies op ‘n treffende manier aan ander oor te dra sonder om lang verduidelikings te gee.

By Oosskool het die leerders Vrydag Idioomdag gehou. Hulle kon gewone klere aantrek en dan hulle gunsteling idiom uitbeeld. ‘Vinkel en Koljander, die een is soos die ander’, tot ‘ek is my juffrou se oogappel’ en ‘daar is ‘n slang in die gras’ en vele meer is uitgebeeld en elke idioom is met kleur in die leerders se geheue vasgelê.