POLOKWANE – Dit gebeur nie elke dag dat gesinne mide-in die week kan wegbreek vir ’n dag vol son en pret nie, maar Erica Pre-Primêr het op 24 September sekergemaak dat dit moontlik is.

Die jaarlikse Familie Pretdag by The Ranch Resort het nie net die skool se kleuters en hul gesinne nie, maar ook die breër gemeenskap bymekaargebring vir ’n dag van lag, beweeg en samesyn.

Die dag het vroeg afgeskop met ’n gesinstap, waaraan selfs die viervoetige vriende deelgeneem het.

Daarna het fietsry die toneel oorgeneem, met jong en oud wat hul vernuf gewys het.

Die roetes het deur die oord gekronkel, waar deelnemers selfs wilde diere van ’n afstand kon beskou.

Vir diegene wat net wou uitspan, was daar gesigverf vir die kinders en vars koffie vir ouers – ’n ideale kombinasie vir ’n gesellige atmosfeer.

Teen 11:00 het die gholfkompetisie begin, met uitdagings en speletjies tussen die gaatjies wat bygedra het tot die feestelikheid.

Na ’n dag vol aktiwiteite het van die jong span reeds aan die slaap geraak, terwyl die ouers die kans gekry het om te ontspan en sommer reeds planne vir volgende jaar se pretdag kon begin beraam.