POLOKWANE – Wat vir Dian Forrester (25) as ’n kinderjare stokperdjie begin het, het ontwikkel in ’n professionele krieketloopbaan wat hom vandag as deel van die Suid-Afrikaanse Uitnodigingspan sien.

“As kind het my ouma altyd die televisie op krieket gehad en my pa het aksiekrieket gespeel. Ek het gereeld saamgegaan om te kyk, dis hoe die liefde vir die sport begin het,” vertel Dian.

Hy het die eerste keer ’n kolf op vierjarige ouderdom vasgehou, en teen sy laerskooldae by Oosskool het hy reeds gereeld gespeel.

Maar eers op 14 het hy besef hy het ‘n talent vir krieket – en toe het die harde werk begin.

Ná sy laerskooljare het hy eers by Hoërskool Pietersburg aangesluit, maar later oorgeskakel na Afrikaanse Seuns Hoërskool in Pretoria vir groter mededinging en meer geleenthede.

“Dit was die beste tyd van my lewe,” sê hy.

In 2023 het Dian se toewyding vrugte afgewerp toe hy ’n oproep kry dat hy vir die Suid-Afrikaanse Uitnodigingspan gekies is.

“Dit was ’n ongelooflike gevoel, ’n tree in die regte rigting waarvoor ek lank gewerk het,” vertel hy.

Dian is ’n veelsydige speler wat links kolf en regs boul.

“Ek geniet dit om links te kolf. Dit gee my meer opsies op die veld, en dit lyk sommer beter ook,” skerts hy. Hy kolf gewoonlik vierde of vyfde in die beurt en is dikwels die eerste bouler wanneer ’n nuwe bal begin gebruik word. Hy het reeds op 11-jarige ouderdom vir Limpopo begin speel en beskou die Leeus as sy grootste teenstanders. “Vierdagkrieket is my gunsteling. Dis waar jy regtig getoets word, jy moet vir lank konsentreer, maar dis die beste formaat wat daar is.”

Hoewel Dian nog baie jare van speel oor het, dink hy reeds aan die toekoms.

“Ek sal graag eendag wil afrig, maar my droom is om ’n kommentator te word. Ek is mal daaroor om wedstryde te ontleed en te bespreek.”

Vir jong spelers, veral sy geliefde Osies, het hy eenvoudige raad: “Geniet die spel. Oefen hard, maar moenie te streng op jouself wees nie. Slyp jou vaardighede, bou herinneringe – en speel altyd met ’n glimlag.”