POLOKWANE – Die tweede Afrikaans-inni-Bos-kuierfees het verlede Saterdag op die terrein van Hoërskool Pietersburg plaasgevind en honderde feesgangers gelok wat van vroegoggend af al hul stoele voor die verhoog kom neersit het, reg om ‘n dag vol Afrikaanse musiek en lekker kuier te beleef.

Die aand se program het afgeskop met die gewilde groep Sonder Onderbroeke, wat met oorspronklike liedjies die verhoog behoorlik aan die brand gesing het.

Later het bekende kunstenaars soos Dodo Nyoka, Bok van Blerk en Droomsindroom die gehoor verder vermaak.

Jong plaaslike talent het nie agtergebly nie, jong Pieties het deur die loop van die middag opgetree en hul stemme behoorlik laat hoor.

Hierdie jaar het die B-veld ook besonder baie lewe gehad, danksy ‘n pretpark wat ure se vermaak vir jonk en oud gebied het.

Die gr. 8-leerders van PHS het reeds Vrydag die Pietie Pretpark uitgetoets nadat hulle as wenners van die Wedloop na Afrikaans-inni-Bosveld-kompetisie aangewys is – ’n eer wat hulle verwerf het deur die meeste kaartjies vir die fees te verkoop.

Feesgangers kon na hartelus deur talle stalletjies rondstap, met eetgoed en speelgoed tot klere wat beskikbaar was.

Een van die besoekers, Michelle Engelbrecht, het die aand saam met haar gesin deurgebring en was vol lof oor die geleentheid: “Ek was verlede jaar ook by die Afrikaans-inni-Bosveld-fees en het dit vreeslik geniet. Vanjaar was dit selfs beter. Ons kom beslis volgende jaar weer!”