Armdrukkers bult spiere
Lede van Lynx Armdruk het aan die onlangse Trophy Challenge in Witbank deelgeneem en uitstekende prestasies behaal.
POLOKWANE – Lede van Lynx Armdruk het aan die onlangse Trophy Challenge in Witbank deelgeneem en uitstekende prestasies behaal.
Martin van Wyk het in die onder 95kg-afdeling deelgeneem en ‘n silwer medalje in sy linkerarm- en regterarm-afdelings gekry. Hy is ook aangewys as die senior armdrukker van die jaar.
Hendrik Fourie het tweede geëindig in sy linkerarm-afdeling en vierde met sy regterarm. Hy het ook die trofee vir junior armdrukker van die jaar ingepalm.
Danie Fourie het eerste in sy regterarm-afdeling geëindig, maar het ‘n besering opgedoen en derde in die linkerarm-afdeling geëindig. Hy het ook in die opeklas deelgeneem en ‘n tweede plek ingepalm.
Liana Fourie het haar senior-skeidsregterskursus voltooi en is ook aangewys as die geleentheidsbeplanner van die jaar.
Dié klub gaan Saterdag hul armdruk-tegnieke tydens die Suid Jolytfees by die Hoër Tegniese Skool Tom Naudé demonstreer. Die vertoning begin om 10:00.
Inwoners word genooi om hul krag teen Van Wyk op die proef te stel. Inskrywingsfooie beloop R25 per persoon en enige iemand wat hom kan klop, wen R500. Om 18:30 sal Hendrik en Danie Fourie teen mekaar te staan kom om te sien wie met die Limpopo-titel sal wegstap.
