Noordelikes-kragmasjien
Die eersteligaspan van BB Truck Noordelikes Rugbyklub het Saterdag op sy tuisveld in Ladanna die eindstryd van vanjaar se Boet Fick amateurkampioenskap teen Letaba van Tzaneen gewen en sodoende sy titel suksesvol verdedig.
POLOKWANE – Die eersteligaspan van BB Truck Noordelikes Rugbyklub het Saterdag op sy tuisveld in Ladanna die eindstryd van vanjaar se Boet Fick amateurkampioenskap teen Letaba van Tzaneen gewen en sodoende sy titel suksesvol verdedig.
Letaba was teen halftyd nog binne trefafstand met 19-10 in Noordelikes se guns, maar die Noordelikes drieëreën het veral in die tweede helfte op Letaba neergestort. Noordelikes het altesaam sewe drieë gedruk om die 2014 eerste ligakroon gemaklik te behou. Die eindtelling was 46-17.
Noordelikes se kaptein en buitesenter, Mynhardt Smith, het twee keer agter die Letaba pale drieë gedruk. Sy spanmaat op losskakel, Johan de Beer, het self nog beter gedoen en hy het ‘n driekuns van drieë behaal. Die ander drieë is deur die binnesenter, Sias van Wyk, en Simba Memese op regterflank gedruk.
Letaba se tweedespan het egter verhoed dat Noordelikes in al drie liga eindstryde koning kraai. Letaba het nouliks met 16-10 vanjaar se tweedeligakampioenskap gewen. Noordelikes se drieë in hierdie eindstryd is deur die heelagter, Armand Fourie, en Arno Venter op losskakel gedruk.
Die derdespan van Noordelikes kon daarin slaag om dit twee uit drie ligakrone vir dié klub te maak toe hulle Letaba in ‘n opwindende stryd met 22-17 geklop het. Noordelikes se drieëdrukkers is Jaco Hough op linkervleuel, die skrumskakel Christo van der Merwe en agtsteman Pieter Mostert. Die span se losskakel, Stephan Nel, slaag met twee doelskoppe en ‘n strafskop.
