Leandri lewe vir skopboks
Leandri Peyper (16) neem al sedert die ouderdom van 6 aan skopboks deel en dit is iets wat sy nie maklik sal prysgee nie.
POLOKWANE – Sy het onlangs aan die Suid-Afrikaanse Skopbokskampioenskap in die Kaap gaan deelneem en drie titels huistoe gebring. Skopboks, verduidelik sy, is vir haar ‘n baie interessante sportsoort.
“Dis ‘n sportsoort wat my fiks hou en dit is vir my lekker om hier te wees want almal by de klub is soos een groot familie,” vertel sy.
Sy is ‘n oud-leerder van Hoër Tegniese Skool Tom Naudé en beskryf haarself as iemand wat lief is vir grappies maak tot sy in die skopbokskruit is, dan is sy vol passie en haar opponente weet hulle is in vir ‘n ding.
Leandri is deel van die Limpopo Provinsie Sport Karate-Kickboxing Akademie (LPSKKA) en vertel dat sy nie terughou net omdat sy ‘n meisie is nie. Sy oefen twee keer ‘n week en hoop om so lank as wat sy kan met dié sportsoort aan te gaan.
Sy vertel sy beveel skopboks vir alma aan. “Ek daag almal uit om te kom kyk wat in dié sportsoort gebeur. Kom kyk gerus wanneer ons oefen en ek is seker die gogga gaan julle ook byt,” vertel sy
Haar afrigter, Nico Myburgh, vertel dat hy groot dinge vir haar toekoms in skopboks verwag met die hoeveelheid toewyding wat sy het.
