POLOKWANE – Jukskeispelers van verskeie skole regoor die stad en Mokopane het verlede Woensdag aan die eerste skole liga vir die seisoen deelgeneem.

Deelnemende skole is Oosskool, Pietersburg Laerskool, Laerskool Krugerpark, Hoër Tegniese Skool Tom Naudé, Hoërskool Pietersburg, Curro Heuwelkruin en Hoërskool Piet Potgieter. Die wedstryde is onderskeidelik by Oosskool en Tom Naudé gespeel.

Die voorsitter van die Limpopo skoleliga, Willa Viljoen, sê sommige spanne het meer wedstryde gespeel as ander.

“Daar was te min bane vir al die spanne om teen mekaar te speel. Na Covid-19 is die dorpsbane vervalle en die badkamers is onbruikbaar, onder andere. Dus kan ons nie die liga daar hou nie. Sou ons van die bane gebruik kon maak, kan die laer- en hoërskole saam op een terrein speel. Dus is dit belangrik dat die Polokwane Munisipaliteit die dorpsbane opknap en in stand hou. Ek weet nie wat ons gaan doen as Waterberg, Mopani en Sekhukhune se skole ook moet bykom nie. Die skole het nie genoeg bane om so ‘n liga aan te bied nie.”

Die volgende wedstryde vind op 24 Mei by PHS plaas. PLS bied die laerskole liga aan, maar aangesien hulle slegs twee bane het, gaan hulle moontlik van Tom Naudé se bane gebruik maak.

Jukskei is ‘n Suid-Afrikaanse sport wat deur die hele familie gespeel kan word. In 2001 is jukskei deur die Suid-Afrikaanse regering gekies om deel te wees van die Inheemse Speletjies-projek.

Spanne bestaan uit vier spelers wat enkel- of dubbelspel kan speel. Behalwe vir Suid-Afrika word jukskei ook in Namibia en die VS gespeel.

Die doel van die spel is om die pen wat in ‘n sandput, 10m-16m ver, staan, om te gooi. Elke speler het twee skeie en daar is twee sandputte wat teenoor mekaar staan en spel vind in beide rigtings plaas.