Enjins brul vir brille en pille
DIE motorfietse se enjins het behoorlik gebrul en daar is aan heerlike pannekoeke en worsbroodjies gesmul tydens die Piet Potgieter Monument Ouetehuis se jaarlikse brille en pille fondsinsamelings
MOKPANE – DIE motorfietse se enjins het behoorlik gebrul en daar is aan heerlike pannekoeke en worsbroodjies gesmul tydens die Piet Potgieter Monument Ouetehuis se jaarlikse brille en pille fondsinsamelings wat verlede Saterdag gehou is.
Die dorp se jonger garde het gewys hulle gee om, so ook die talle motorfietsklubs se lede wat van oral in die omgewing gekom het om die dag saam met die oues van dae te geniet.
Vir die bejaardes was daar nie tyd om aan hul skete, brille en pille te dink nie en hul glimlagte was groot oor die goeie opkoms en lekker samesyn.
Mariaan van Tonder, bestuurder van die ouetehuis, sê die dag was weereens ‘n reuse sukses met ‘n rekordgetal mense wat vanjaar die liefdadigheidsprojek kom ondersteun het.
Meer as R20 000 is gemaak uit die verkope van die bejaardes se stokperdjie-artikels.
Die ouetehuis sê dankie die ondersteuning is vir hulle kosbaar en wys hoeveel die gemeenskap omgee vir die bejaardes van die dorp.
