SECUNDA – Een man is dood en ’n vrou is in ’n koma in ’n hospitaal in Johannesburg nadat sy hoofbeserings opgedoen het in ’n ongeluk Dinsdag, 29 Julie op die hoek van PDP Kruger- en Danie Theronstraat.

Na wat verneem word was die vrou en twee mans in die motor wat met ’n ander motor met net een insittende in, gebots het.

Die vrou is blykbaar uit die motor geslinger en haar vriend moes uit die motor gesny word en is toe langs die motor deur ambulanspersoneel behandel.

Hy is later in die Mediclinic Highveld dood.

Die polisie het later glo uitgevind dat die bestuurder van die motor waarin die oorledene en die vrou gereis het, van die ongelukstoneel weggehardloop het.

Die bestuurder van die ander motor het geen ernstige beserings opgedoen nie.

Geen verdere inligting was bekend nie.

Druk op die skakel om die fotos te kyk.