EVANDER – Chante Graham ’n 16 jarige meisie wat op Donderdag, 16 Oktober aangeval is terwyl sy gaan draf het, is reeds uit die hospitaal ontslaan.
Sy is ’n gr 10 leerling van Hoërskool Evander High School en is ’n kranige atleet wat in gewigstoot, 100-meter hardloop en aflosse uitblink en was besig om vir die Top 10-atleetbyeenkoms wat op Saterdag, op 25 Oktober op Mbombela plaasvind, te oefen.
’n Frisgeboude man van sowat 30, met ’n Sasol-uniform aan en ’n lang baard, het haar op die hoek van Luzaan- en Raymond Mhlabastraat voorgekeer om rigtingaanwysing te vra.
Hy wou ook ’n oproep maak, maar sy het nie haar selfoon by haar gehad nie.
Sy het haar rug op hom gedraai waarop hy haar in die pad vasgedruk het, op haar geklim het en haar probeer verwurg het.
Die aanvaller het haar twee keer op haar oog geslaan,
Hy het ’n lang silwer voorwerp uit sy sak gehaal en haar naby ’n oog en in haar arm, bors en regtersy gesteek, waarna hy weggehardloop het.
Sy het opgestaan en het terug gehardloop huis toe.
Mnr. Sydney Graham, Chante se pa, het haar na die Evander Hospitaal geneem waar sy opgeneem was.
“Ek het twee keer geskree, maar hy het aangehou om my met dié voorwerp te steek,” het Chante gesê.
Nog niemand is in hegtenis geneem nie.
