’n Lid van die Standerton Kommando het gedurende die vroeë oggendure van Maandag, 31 Oktober ander lede van die kommando van vermoedelike kabeldiefstal in Kosmospark in kennis gestel.

Die kommando is vinnig uit na die toneel langs die Secundapad verby Waterbokstraat en het met ondersteuning van Kasselman Veiligheidsdienste ’n beeswagter, wat uitgeken is deur ’n ooggetuie, in hegtenis geneem.

In die verdagte se rugsak is ’n saag en koper gevind wat vermoedelik vanuit sewe gestroopte kragbokse in die omgewing afkomstig is.

Die Lekwa Munisipaliteit het ’n klag van koperdiefstal geopen.

“Ons wil Kasselman Veiligheidsdienste vir hul hulp en bystand tydens die voorval bedank,” het me. Nadia Smith, woordvoerder van die kommando, gesê.