Sonia pas in haar vrye tyd mense se troeteldiere op as hulle weggaan met vakansie

Me. Sonia Viljoen het ‘n deeltydse werk geskep uit haar liefde vir diere.

Sy is die soort mens wat, as daar mense met honde in die straat verbyloop, hulle sal voorkeer om die honde te vryf.

Me. Viljoen pas in haar vrye tyd mense se troeteldiere op as hulle weggaan met vakansie. Sy het eers net haar kollegas se diere opgepas en later besluit om mense se huise en troeteldiere op te pas nadat vriende haar oortuig het om haar dienste op Facebook te adverteer.

Sy het baie navrae en belangstelling gekry, hoewel dié stokperdjie seisoen-spesifiek is.

“Ek is nogal besig oor Desember en lang naweke,” het me. Viljoen gesê.

Me. Viljoen en haar dogter, Hayley (9), geniet dit en gaan gee nie net kos vir die troeteldiere nie, maar slaap ook in as haar kliënte dit vereis.

By huise waar sy net gaan kosgee, doen sy ook meer as die versorging van die troeteldiere en speel ook met hulle en gee bietjie aandag.

Sy het selfs al pappegaaie gehad as troeteldiere, maar het nou afgeskaal en het net drie Yorkshire terriërs. Me. Viljoen het op Oudshoorn grootgeword en op Ladysmith en Riverdal gewoon voordat sy in 2008 na Secunda verhuis het. Sy speel ook klavier en het as kind blokfluit gespeel.

“Ek het lanklaas die blokfluit opgetel, maar behoort dit nog te kan speel,” het sy gesê.

Me. Viljoen het op ‘n stadium klavier vir die Katolieke Kerk op Evander gespeel, maar deesdae speel sy net vir ontspanning.

Sy werk as ‘n kwaliteitskoördineerder by MegChem.

Vir meer nuus besoek gerus ons ander webblaaie. Standerton Advertiser & Highvelder

“Like”’ ons op Facebook en volg ons op Twitter en Instagram.