SECUNDA – Verskeie wintersportspanne van Hoërskool Oosterland het die naweek aan die eindrondes van die Puk-reeks vir mediumskole deelgeneem.
Die 0/14-rugbyspan het op Potchefstroom teen die span van Hoërskool Bekker uitgedraf en gelykop gespeel met 17 punte elk.
Die Oosies se 0/15-span het Hoërskool Bekker met 14-10 geklop, die 0/16-span het Overvaal met 31-0 oorheers en die tweedespan het hul wedstryd teen Bekker met 31-5 gewen. Die eerstespan het egter met 27-31 verloor.
Lees ook: [VIDEO] Gr. 9-leerder van Hoërskool Oosterland moet dringend operasie kry
Die Oosies se dogtershokkiespanne het behoorlik uitgeblink.
Die eerstespan het 0-0 teen Hoërskool Leeuwenhof geëindig. Die tweedespan het Hoërskool Bekker met 2-0 geklop. Die 0/16-span het Wolmeranstad met 4-0 geklop en die 0/14-span het Vryburg met 8-0 vermorsel. Die 0/15-span en Overvaal het gelykop (0-0) gespeel.
Die eerste seunshokkiespan is die Puk-reeks se wenners vir die tweede agtereenvolgende jaar.
Die 0/16-netbalspan was die enigste Oosie-netbalspan wat gewen het. Hulle het Wolmeranstad met 22-11 geklop.
Oosterland se skaakspan het ook algeheel derde uit 16 skole in die Puk-reeks gekom. Renier du Toit was die algehele wenner van sy bord.
