Vragmotor en kar bots op R23 na Balfour

Die roete van Standerton na Balfour het die aand van 14 Augustus vir ’n ongeluk gesorg toe ’n vragmotorbestuurder van agter in ’n Toyota Corolla vasgery het.

Jelani Security se mnr. Alf Byleveldt was naby Val en het op die toneel opgedaag.

Mnr. Byleveldt het gesê dat provinsiale ambulansdienste drie mense, met geringe beserings, na die Standerton Hospitaal vervoer het.

Val Polisie was op die toneel.

Die Standerton Advertiser het op 16 Augustus probeer om met die polisie in verbinding te tree om navraag oor ’n ongeluksverslag te doen, maar die telefoon is nie geantwoord nie.

Die oorsaak van die botsing is onbekend.