Restaurant ondersteun ouers van Downsindroom-seuntjie
Morné Lesley vermaak gehoor by restaurant op Secunda vir geldinsamelingsgeleentheid
SECUNDA – Panarottis in Secunda Mall het op Woensdag, 27 Februarie ‘n geldinsameling vir Shaun Naudé (2), ‘n Downsindroom-seuntjie, aangebied.
Die sanger, Morné Lesley, het die gehoor met sy sang vermaak.
Shaun se ouers, mnr. Jacques en me. Chantal Naudé, het 10 jaar vir Shaun gewag en glo hy is ‘n klein wonderwerkie.
In dié 10 jaar het me. Naudé verskeie miskrame gehad, en die egpaar het ook vrugbaarheidsbehandeling ondergaan.
Klein Shaun moes ná sy geboorte op 8 November 2016 vir vier weke in die intensiewe sorgeenheid van die hospitaal bly omdat hy probleme met sy hart en longe gehad het.
Dokters het destyds tydens me. Naudé se swangerskap, nie agtergekom dat hy Downsindroom het nie.
Die egpaar het kort na Shaun se geboorte ‘n ondersteuningsgroep vir gesinne van Downsindroom-kinders begin.
Shaun sien gereeld spesialiste en ‘n neuroloog. Sy ouers se droom is om hom na ‘n privaatskool te laat gaan as hy ouer is.
Hoewel die gesin ‘n mediese fonds het, dek dié fonds nie al die spesialiste se kostes nie, en die gesin moet dus self vir baie van die besoeke betaal.
Mnr. Naudé het die span van Panarottis en almal wat hulle ondersteun het met die geldinsameling, bedank.
