Kankerlyer Tanya benodig chemo-terapie

SECUNDA – Me. Tanya Strydom se vriende en familie wil haar help deur dit moontlik te maak dat sy vir nog chemo-sessies kan gaan.

Me. Strydom se kanker is terug nadat sy in 2016 vir die eerste keer met borskanker gediagnoseer is.

Sy moes ‘n dubbele mastektomie ondergaan en het chemo-terapie ontvang.

“Ek het een dag op my bed gesit en daar het swart etter by my tepel uitgekom,” het sy vertel.

Sy is dadelik dokter toe, maar die dokters het nie dadelik agtergekom sy het kanker nie en het eers gesê daar is iets fout met haar melkkliere.

Van die dokters wat sy destyds gaan sien het, het selfs gesê sy makeer niks.

Me. Strydom het later na Ellisras verhuis en haar huisdokter daar gaan sien.

Hy het haar na Pretoria verwys vir ‘n mammogram, sonar en biopsie.

Teen die tyd dat dokters die kanker opgetel het, was dit reeds gevorder tot fase 4.

Me. Strydom het destyds nog ‘n mediese fonds gehad, maar nou nie meer nie.

Me. Strydom het egter sowat twee maande terug pyn op haar maag gekry en is weer terug dokter toe.

Na vele ondersoeke en verskeie dokters, is kanker weer eens by haar gediagnoseer.

Dié keer is die kanker in haar long, lewer en borste.

Die chemo-sessies wat me. Strydom ondergaan, kos sowat R3 000 per keer en sy moet tans alles kontant betaal omdat sy nie ‘n mediese fonds het nie.

Sy is in die proses om weer ‘n mediese fonds te kry, maar hulle betaal glo nie vir die chemo-terapie in die eerste jaar nie.

“Ek sal eers ‘n jaar op die mediesefonds moet wees voordat hulle betaal,” het me. Strydom gesê.

As sy vir chemo gaan, moet sy ook elke keer bloedtoetse laat doen en medikasie kry.

Haar twee dogters is onderskeidelik sewe en 14 jaar oud.

Sy het die eerste keer toe sy met kanker gediagnoseer is, vir hulle ‘n skêr gegee om haar hare te sny sodat hulle meer voorbereid sou wees as haar hare later uitval van die chemo-terapie.

Me. Strydom se hartsvriendin, me. Christelle Erasmus, ondersteun haar en probeer geldinsamelings-geleenthede reël om haar las ligter te maak.

Die Adlers Motorfietsklub het reeds ‘n skenking aan me. Strydom gemaak.

Stoepstories en Our Place ondersteun haar ook.

Me. Erasmus wil ‘n trust stig vir me. Strydom se mediese onkoste.

Me. Strydom het elke individu en onderneming wat haar tot dusver ondersteun het, bedank.

Vir meer inligting, of om haar te help, skakel me. Erasmus by 082 855 2072.