Wilna Jordaan leef voluit met ‘n dankbare hart

SECUNDA – Die woord stilsit bestaan nie in me. Wilna Jordaan, fisioterapeut en voorsitter van Secunda Marathonklub, se woordeskat nie.

Me. Jordaan het gesê dit is net genade dat sy al 11 keer die Comrades Marathon kon hardloop.

Sy neem al van jongsaf deel aan sport en het op skool en op universiteit hokkie en muurbal gespeel.

“Ek het op universiteit ook aan trapkar-wedrenne deelgeneem, maar dit het nou uitgesterf,” het me. Jordaan vertel.

Sy het eintlik op skool aan kort afstande deelgeneem, maar sy het dit net gebruik om vir die hokkieseisoen fiks te word.

Sy het egter nog altyd ’n droom gehad om aan die Comrades Marathon deel te neem.

Me. Jordaan het in Pretoria grootgeword en ná skool fisioterapie studeer by die Kollege vir Fisioterapie in Pretoria.

Sy het ná haar studies, vir ’n jaar by die Boksburg-Benoni Hospitaal gewerk en daarna by die Steve Biko Hospitaal in Pretoria.

Me. Jordaan en haar man, mnr. JD Jordaan, het in Februarie 1983 Pretoria vir Secunda verruil.

Sy het vir sowat drie maande by die Winkelhaak-mynhospitaal op Evander gewerk en later vir drie jaar by ’n privaatpraktyk op Secunda.

Die Departement van Gesondheid het haar later genader om ’n afdeling vir fisioterapie by Evander Hospitaal te begin en in dié tyd moes sy ook twee oggende weekliks na Standerton ry om pasiënte by die staatshospitaal daar te sien.

Toe haar oudste kind in 1988 gebore is, het sy vir ’n rukkie by die huis gebly en later ‘locum’-werk op Bethal gedoen.

Sy het in 1991 saam met haar skoonsussie wat ook ’n fisioterapeut is, haar eie praktyk begin.

Me. Jordaan en haar man het al ses keer aan die Argus Fietswedren in die Kaap asook twee keer aan die 94.7 Fietswedren in Johannesburg en een keer aan die Amashova Durban Fietswedren deelgeneem, onder andere ook op ’n tandemfiets.

Sy het verlede jaar vir die laaste keer aan die Comrades Marathon deelgeneem.

“Ek het bietjie afgeskaal met wedlope.

“My droom was om een keer aan die Comrades Marathon deel te neem en ek het nou 11 gedoen.”

Toe sy haar 10de Comrades voltooi het, het sy besluit om nog net een keer te hardloop sodat sy met haar groen nommer aan haar laaste en 11de Comrades Marathon kon deelneem.

Sy het groot geskrik ses weke na dié Comrades Marathon toe sy in die hospitaal opgeëindig het met ’n bloedklont.

“Ek besef alles is net genade,” het me. Jordaan gesê en is dankbaar dat sy vandag nog hier is. Dokters vermoed die bloedklont het al twee weke voordat sy hospitaal toe is, geskiet en deur haar long gegaan.

Me. Jordaan het vanaf 2002 tot 2007 aan meestersatletiek deelgeneem en haar Mpumalanga-kleure in dié sportsoort verwerf.

Haar item was resiesstap en sy het aan die 5 000m op die baan deelgeneem asook 10km op die pad.

Sy het in 2007 aan die Wêreld Meesters Atletiekkampioenskap in Italië deelgeneem.

Sy het vanjaar die ander Comrades-atlete gaan ondersteun en dit as ’n wonderlike ondervinding beskryf.

Me. Jordaan het ook al drie keer die Two Oceans Marathon in Kaapstad voltooi.

Sy het al 10 Kosmos 3-in-1-wedlope agter haar naam en beplan om aan die Mauritius-marathon deel te neem.

Sy neem deesdae aan ‘trail running’ deel.

Sy het al aan drie Rhodes-wedlope deelgeneem en haar permanente nommer verwerf.

Dié wedloop is ’n drie-dag-wedloop en word as ’n ASA-wedloop gereken.

Me. Jordaan het gesê dit was ’n ongelooflike ondervinding toe dit begin sneeu het tydens dié wedloop.

Me. Jordaan het ook drie-dag ‘trail runs’, die Karkkloof, Golden Gate-uitdaging en die RCS Sox-uitdaging klaargemaak.

Die Parys-marathon in Frankryk en die Rotterdam-marathon in Nederland wat sy in 2014 saam met vriende aangepak het, was vir haar ’n voorreg.

Me. Jordaan geniet dit ook om te stap en het al verskeie staptogte wat die Amatola, die Otter, Tsitsikamma, Fanie Botha, die Visrivier, die Walvis en die 301 Kalahari-staptog insluit, aangepak en klaargemaak.

Sy beplan om as sy aftree, meer tyd in die natuur te bestee en veldblomme en die seelewe te leer ken en om meer mosäiekwerk doen.

Die Camino-staptog in Spanje is op haar ‘bucket list’ en iets wat sy nog graag sal wil aanpak.