SECUNDA – AfriForum se ankerdorp vir Oktober is Secunda en dié organisasie beplan groot dinge.
Hulle het ‘n stalletjie by die Secunda Landbouskou gehad wat vanaf 26 tot 29 September plaasgevind het.
Lede en vrywilligers van AfriForum gaan op Dinsdag, 1 Oktober promosie-items by verkeersligte uitdeel vanaf 6vm tot 7vm en op Vrydag, 4 Oktober hou hulle ‘n nasionale veiligheidspatrollie waarvan Secunda ook deel is.
AfriForum se fietspretrit van 6km vind op Saterdag, 5 Oktober plaas by die Kansa Aflos-geleentheid by Laerskool Goedehoop.
Van die ander geleenthede wat AfriForum vir Oktober beplan, is dr. Morné Mostert wat op Woensdag, 9 Oktober om 12nm by Lake Umuzi gaan praat.
Dr. Mostert is die direkteur van die instituut vir navorsing aan die Universiteit van Stellenbosch. AfriForum sal op Donderdag, 10 Oktober weer promosie-items by verkeersligte op Secunda uitdeel, verras ‘n onderneming met middagete en hou weer ‘n massa-veiligheidspatrollie op Saterdag, 12 Oktober.
Hulle beplan om die inwoners van Davieshof op Woensdag, 16 Oktober te bederf met ‘n goedvoelaksie en hulle teiken skole op Donderdag, 17 Oktober om bome te plant.
Inwoners is welkom om AfriForum se skoonmaakaksie wat op Saterdag, 19 Oktober in Nelson Mandelaweg oorkant die mini Pick n Pay plaasvind, te ondersteun.
Vir meer inligting, besoek www.ankerdorp.co.za of skakel mnr. Jan du Plessis by 061 731 3581.
