‘Stasiesaal’ op Bethal weer verniel
Dit is skrikwekkend om te sien hoe die saal lyk. Toilette en wasbakke is heeltemal uitgebreek, vloekwoorde is in Afrikaans op die mure geskryf en verskeie name en slagspreuke is ook in Engels op die mure gegriffel.
BETHAL – Plaaslike inwoners en sakelui is raadop oor die gemors by die ‘Stasiesaal’ in Stasieweg.
Blykbaar het Sasol in 2015 die saal opgeknap en selfs palissades rondom die gebou gesit.
Vandag is die saal weer onbruikbaar.
“Die probleem is dat hier allerhande snaakse dinge in die gebou gebeur. Dit is die perfekte plek vir skelms om in weg te kruip. Kwaaddoeners is dag en nag besig om moeilikheid hier te maak. Dit beïnvloed ons besighede en maak dit maklik vir inbrekers om ons geboue te teiken,” het ‘n eienaar van ‘n sakeonderneming gesê.
Dit is skrikwekkend om te sien hoe die saal lyk.
Toilette en wasbakke is heeltemal uitgebreek, vloekwoorde is in Afrikaans op die mure geskryf en verskeie name en slagspreuke is ook in Engels op die mure gegriffel.
Jy sal sukkel om ‘n venster te kry wat heel is.
Stukke glas lê oral om die gebou soos wat dit moontlik uitgeslaan en stukkend gegooi is.
Die verhoog wat van hout aanmekaar gesit is, is opgelig en die hele voorste stuk van die verhoog is reeds weg.
Dit lyk asof iemand met ‘n motorfiets op die houtvloer in die saal ‘donuts’ gemaak het.
Aan die agterkant van die gebou staan ‘n matras regop in een van die deure en dit lyk of iemand daar woon.
Niemand kon ons ‘n antwoord gee wie vir die gebou verantwoordelik is nie.
