Ouma op Bethal word 99 jaar oud
Dogter sê haar ma is nog gesond en haar verstand nog helder
BETHAL – Me. Kobie Kloppers het op Vrydag, 20 Desember haar 99ste verjaardag by Residentia Palmoord Ouetehuis gevier.
Die personeel en inwoners van Palmoord het dié spesiale dag saam met me. Kloppers gevier, asook van haar kleinkinders.
Me. Kloppers het op Vereeniging grootgeword en vir 10 jaar op Secunda in ‘n meenthuis gewoon voordat sy sewe jaar gelede na Palmoord verhuis het.
Sy het drie kinders gehad, maar haar twee seuns is 10 jaar gelede ‘n jaar uitmekaar dood.
Hulle het onderskeidelik aan suikersiekte en leukemia gesterf.
Me. Kloppers het een kind oor, ‘n dogter, me. Annetjie Kotze (64) wat op Secunda woon, sewe kleinkinders en nege agterkleinkinders.
Me. Kotze het gesê haar ma is nog gesond en haar verstand is nog helder.
“Sy drink net een pil daagliks vir haar bloeddruk,” het me. Kotze gesê. “Sy sukkel net met haar sig en gehoor.”
Me. Kloppers het borskanker oorkom en toe sy 83 jaar oud was, moes sy ‘n mastektomie ondergaan het.
Sy was vir 43 jaar getroud met mnr. Jacobus Kloppers (77) totdat hy sowat 34 jaar gelede aan hartversaking dood is.
