Alzheimers-inwoners se humor nie verlore
“Net toe ek gedink het dat tannie Dawn klaar is met haar mannetjie, het sy die stertjie bygevoeg,” het me. Van Schalkwyk skertsend gesê.
Die inwoners van die SAVF-tehuis se Alzheimers-eenheid het onlangs in een van hulle kunsklasse met klei gewerk.
Me. Santa van Schalkwyk, verpleegster by dié eenheid, het vertel dat hulle weekliks kunsklasse vir die inwoners aanbied om hulle geheue te stimuleer.
Sy het bygevoeg dat dié inwoners nie onlangse gebeure onthou nie, maar dat hul langtermyngeheue ongeaffekteer is.
“Ons doen weekliks verskillende klasse met die seniorburgers om hulle uit hul kamers te kry en hulle breine aan die werk te sit.”
Me. Dawn Nel (83) het tydens een van die klasse ’n stokman van klei gemaak.
“Net toe ek gedink het dat tannie Dawn klaar is met haar mannetjie, het sy die stertjie bygevoeg,” het me. Van Schalkwyk skertsend gesê.
Sy het verder vertel dat die inwoners baie trots op hul kunswerke is en dat dit in elkeen se kamer uitgestal word.
Enige persoon wat kunsbenodighede wil skenk, kan die SAVF-tehuis skakel by 017 819 3617.
