ERMELO – Ná ‘n lang gewag vir Teagan van Wyk se vyfde verjaardagvieringe, het dit uiteindelik op 14 Augustus aangebreek.

Dié opwinding het reeds op 10 Augustus afgeskop nadat Teagan se ma, me. Maggie van Wyk, ’n video gewys het waarop die wêreldbekende akteur, Dwayne “The Rock” Johnson, met hom gesels.

In dié video het Johnson gesê dat hy Teagan se grootste aanhanger is.

Me. Van Wyk het gesê: “Ek het nog nie sy gesiggie só sien ophelder en glimlag sedert ons in 2018 met die behandeling begin het nie.”

Sy het Johnson en sy span bedank toe hulle Teagan se grootste verjaardagwens bewaarheid het.

Vriende en familie van die gesin was op 14 Augustus deel van die spesiale verjaardagpartytjie – wat weens die koue weer, binnenshuis plaasgevind het.

Me. Van Wyk het vertel dat hoewel hulle nie die springkasteel kon opslaan nie, Teagan steeds ’n fees gehad het en saam met sy maatjies baljaar het.

Daar was heerlike lekkergoedpakkies, spookasem, ’n pragtige koek, kolwyntjies, worsbroodjies, koeldrank en springmielies.

Teagan het nie baie van die lekkernye geëet nie, en sy ma het vir hom sy gunsteling aartappelskyfies gebak.

“Die adrenalien het hom aan die gang gehou vir die dag, maar ongelukkig het die dag ook sy tol op sy kleine lyfie geëis,” het me. Van Wyk vertel.

Lees meer oor klein Teagan se vyfde verjaarsdag in die volgende uitgawe van die Hoëvelder.