Christa Swanepoel besoek Sabers Décor op Trichardt

Christa Swanepoel, ’n meester van brei en hekel en skrywer van verskeie boeke wat handel oor brei- en hekelwerk, besoek Trichardt op Saterdag, 18 September.

Brei- en hekelliefhebbers sal dan die kans kry om me. Swanepoel persoonlik te ontmoet en met haar te gesels.

Sy gaan op dié dag vanaf 09:00 tot 12:00 by Sabers Décor.

Belangstellendes staan die kans om van me. Swanepoel se brei- en hekelboeke te wen en om afslag te kry op sekere produkte by Sabers.

Me. Swanepoel het haar liefde vir handwerk by haar ma gekry en sy het gesê as sy terugdink aan haar grootwordjare, was haar ma altyd besig met een of handwerkprojek.

“Ek onthou nog die bevredigende gevoel toe ek my eerste voltooide projek aanskou het toe ons nog op skool was en in die destydse standerd 3 (gr. 5) ’n babatruitjie moes brei,” het me. Swanepoel vertel.

Vandag, bykans 60 jaar later, beleef sy steeds dieselfde opwinding elke keer as sy ’n projek voltooi het.

Me. Swanepoel het destyds, in 1999 net nadat Vrouekeur sy verskyning gemaak het, as subredakteur en taalversorger vir dié tydskrif begin werk en ook die brei- en hekelblaaie hanteer.

Daar het laterjare medewerkers bygekom, maar me. Swanepoel was by Vrouekeur betrokke totdat dié tydskrif verlede jaar, tydens die eerste inperkingstyd in Suid-Afrika, sy deure moes sluit.

“Skielik was ek werkloos en radeloos.

“Ek was toe reeds 67.

“Na die aanvanklike skok, moes ek ’n plan maak om ’n inkomste te genereer en toe het my liefde vir brei en hekel ’n uitkoms gebring.

“My dogters het my gehelp om ’n Instagram- en Facebook-blad te begin en the_jezi is gebore.

“Ek en my oudste dogter het truie op bestelling begin brei, my jongste hanteer die admin en my skoondogter speel model.”

Me. Swanepoel het, as deel van een van haar projekte by Vrouekeur, ’n fairisle-trui vir die bekende komediant, Schalk Bezuidenhout, gebrei en hy het haar daarna weer genader om vir hom ’n trui wat lyk soos ’n truitjie wat sy ma vir hom gebrei het toe hy nog ’n baba was, te brei.

Hy het later nog ’n trui met sy jong hondjie se gesig op, by me. Swanepoel bestel en op sy Facebook-blad vertel van sy ‘breitannie’ en mense na me. Swanepoel se Instagram-blad verwys.

“Danksy Schalk het ek my eerste winter as werklose oorleef met die talle bestellings wat ingestroom het.

“Toe die inperking effens gelig is, het ek begin klas gee vir mense wat wou leer brei en hekel en van daar het dit gegroei tot waar ek by ’n oudkollega van Your Family, Jenny van der Walt, se handwerkwinkel in Kayalami begin klas gee het.”

Dié kollega het insussen na Bronkhorstspruit verhuis en me. Swanepoel gaan moontlik binnekort daar klasgee.

Sy ontwerp, brei en hekel ook vir artikels vir die Elite Yarns se webwerf.

Sy het, gedurende haar jare by die Vrouekeur, verskeie brei- en hekelboeke deur LAPA uitgewers vrygestel en vroeër vanjaar is ’n keur uit al daardie boeke deur LAPA uitgegee en Penguin Uitgewers, wat LAPA oorgekoop het, het pas ’n boek met 20 hekeltegnieke goedgekeur wat voor volgende winter sal verskyn.

Dit sal me. Swanepoel se 35ste boek wees.

“Ek is ontsettend dankbaar vir die geleenthede wat ek danksy my liefde vir brei en hekel gekry het en steeds kry.”

Sy woon in Johannesburg en gee klas waar en wanneer vroue iets nuuts wil leer.

Sy is die ma van vier volwasse kinders en twee kleinkinders met wie sy graag tyd bestee.