Vroue op Secunda sny hare vir Kansa
Jeanine moedig ander vroue aan om ook hare te sny.
’n Groep vroue van Secunda het besluit om terug te gee aan die gemeenskap deur Kansa te ondersteun.
Me. Elzaan Strauss, me. Jeanine Maree en me. Monica Bekker het hul hare gesny om dit per koerier na Kansa se kantoor in Nelspruit te stuur.
Beide me. Strauss en me. Maree het dit al voorheen gedoen, maar dit was me. Bekker se eerste keer.
Dié drie vroue het sommer ’n dag van dit gemaak op Donderdag, 21 Oktober en ’n fotograaf, grimeerkunstenaar, haarkapper en ’n vriendin of twee gekry om die dag saam met hulle te geniet.
’n Plaaslike fotograaf, me. Chantél Röttcher het ’n fotosessie in haar ateljee vir die drie vroue gedoen, me. Elzanne Serfontein van Smack Hair & Make Up het al drie vroue se grimering gedoen en ’n haarkapper, me. Adele Boast-Miller het een van die vroue se hare gesny terwyl die ander twee ’n paar dae later hul hare by ander haarkappers gaan laat sny het.
Me. Bekker beplan om sowat 30cm van haar hare aan Kansa te skenk, me. Strauss sowat 35cm en me. Maree sowat 45cm.
Dié drie vroue asook hul vriendinne wat saam die dag geniet het, het elkeen al ’n familielid aan kanker afgestaan en wil met dié projek meer mense van kanker bewusmaak.
Me. Maree het met die inisiatief gekom en sy het gesê hulle wil met dié projek graag ander vroue wat lang hare het, uitdaag en motiveer om ook hul haredos af te sny en aan Kansa te skenk.
