Secunda-haarkapper Nan tree af na 40 jaar

Me. Nan Coetzee (59) sit na 40 jaar as haarkapper, haar skêr en haardroeër neer.

Haar ma, me. Frieda van der Heever, was destyds, toe Secunda net ontstaan het, die heel eerste haarkapper in die Senecta Winkelsentrum.

Dit is te danke aan haar dat me. Coetzee besluit het om ook dié loopbaan te volg.

Me. Van der Heever is so drie jaar gelede in die ouderdom van 77 dood.

“Alles wat ek weet, het ek by haar geleer,” het me. Coetzee gesê.

Ná sy haar skoolloopbaan voltooi het, het me. Coetzee ’n drie jaar-kursus in haarkappery by die destydse Haarkapper Kollege in Pretoria gevolg.

Sy het destyds by drie Italiaanse mans geleer hoe om hare te sny en te stileer.

Me. Coetzee het verskeie haarsalonne op Trichardt en Secunda besit en 17 jong vroue het onder haar opleiding geleer hoe om haarkappers te wees en van hulle het later hul eie haarsalonne geopen.

Een van haar jonger kollegas neem haar salon wat huidiglik op Secunda is, oor terwyl me. Coetzee nou meer op geestelike berading wil fokus.

Sy het reeds ’n kursus in geestelike berading in Kemptonpark voltooi en sy meen sy wil ook nog jonk genoeg wees om haar kleinkinders te geniet.

“As haarkapper, werk ’n mens maar lang ure, so ek kon nie so baie tyd met my kleinkinders bestee nie, nou behoort ek kans te kry vir dit,” het sy gesê.

Sy het ses kinders en 15 kleinkinders wat op Bethal, Secunda en in die Kaap woon.

Die hoogtepunt van haar 40 jaar-loopbaan as haarkapper was om elke keer te sien hoe sy in jonger vroue kon belê deur hulle op te lei en te bemagtig.

“Dit was vir my goed om te sien elke keer as hulle ’n sukses van hul loopbane as haarkappers maak en hulle vlerke sprei en op hulle eie gaan,” het me. Coetzee gesê.

Sy en haar man van die afgelope 24 jaar, mnr. Jan Coetzee, geniet dit om te reis en was al verskeie kere in Israel onder andere.

Me. Coetzee het in 2016, terwyl hulle in Israel getoer het, geval en haar enkel gebreek.

Dit was vir haar een van die laagtepunte van haar loopbaan, want na haar hersteltyd kon sy nie meer so lank staan om hare te doen nie.

“Ek het toe net ’n paar kliënte se hare gedoen,” het sy gesê.

Van die ander plekke wat sy al besoek het, is Griekeland, Turkye, Venesië, Thailand en Mauritius.

Me. Coetzee skryf graag geestelike musiek en het ’n profetiese bediening in musiek.

Sy tree op aanvraag by kerke en ander geleenthede op.

Sy geniet dit ook om in die tuin rond te krap in haar vrye tyd en speel op haar kitaar met 12 snare.

Sy is dankbaar dat haar man haar gedurende haar loopbaan ondersteun het en destyds finansieël voorsien het sodat sy ’n salon kon oopmaak.