Plaaskuier-basaar sorg vir groot vermaak op Delmas
Getrou aan Delmas-tradisie was daar ook vars verwerkte vleis en groente vanuit die kontrei te koop aangebied.
Die N.G. Kerk se moedergemeente op Delmas het die gemeenskap met alles wat lekker is en nog vele meer vermaak tydens hul tradisionele kerkbasaar.
Dié Plaaskuier en Proefees het op Saterdag, 5 Maart in die lowergroen tuin van die N.G. Moedergemeente plaasgevind.
Die trompoppies van Laerskool Eloff en Heidi Kleuterskool het met hulle prettige danspassies op die maat van musiek vir groot vermaak gesorg.
Ook Hoërskool Stoffberg se rasieleiers het die basaargangers behoorlik op hul voete gehad met hul pragvertoning.
Besoekers kon in die plaastuin aan al wat ’n tradisionele basaarkos smul.
Daar was heerlike kerrie en rys, worsbroodjies, swarma’s, vetkoek, nagereg en wat sou ’n kerkbasaar dan nou sonder suikersoet pannekoek wees.
Die soettafel het behoorlik gekreun onder die heerlikste tuisgebak en besoekers kon selfs ’n bietjie wynproe doen.
Getrou aan Delmas-tradisie was daar ook vars verwerkte vleis en groente vanuit die kontrei te koop aangebied.
Verskeie uitstallers het hul goedere uitgestal en daar was items om van te kies en te keur vir elkeen se smaak.
Vermaak vir die kleingoed het inkleurkompetisies, treintjie-ry, ’n springkasteel, gesiggie-verf en vele meer ingesluit.
Die basaar het vroegmiddag ten einde geloop en basaargangers het dit eens gehad dat die groot bome en plaaskuier by die Moedergemeente ’n wenner was na die lang droogte tydens die Covid-19-inperking.
