Duisende word verwelkom by die 30ste Val Boeredag

Hierdie jaar se Val Boeredag het op 2 Julie sowat 6 000 mense vanoor die hoëveld gelok; boere, gesinne, uitstallers en entoesiastiese optreders het die 30ste Val Boeredag saam gevier.

Sedert die hek om 08:00 amptelik geopen het, het die publiek die stalletjies ingevaar en die dag se vermaaklikhede onmiddellik begin verken.

Kinders het met kleurvolle gesiggies tussen die speelgoeduitstallers en die speelgebied gedwaal. Tieners het lekker saam gekuier en die vermaaklikheid by die stalletjies ingeneem.

Vir ma was daar talle stalletjies met mooi ditjies en datjies, en pa kon verdwaal tussen die voertuig-, trok- en trekkeruitstallers. Standertonners het beslis hulle merk op die Val Boeredag gemaak en het talle stalletjies beman.

Die Volle Evangeliese Kerk (VEK) het sosatierolle verkoop. ’n Verfrissende koeldrank en iets te ete was by die AGS Ekklesia-stalletjie beskikbaar.

Die vrywilligers van Kosmos Aftreeoord het kerrie en rys verkoop. Elke hoek en draai het nog ’n vriendelike gesig gehou wat Standerton verteenwoordig het. Die stemme van Willem Botha, Robbie Wessels, Ricus Nel en vele meer het oor die luidsprekers gespeel.