Rayties woeker by robotika-uitdaging
Albei Rayties-spanne het goue status ontvang met robotspel tellings van meer as 100 punte per ronde.
Sewe Laerskool Rayton-leerders het verlede maand uitstekend gevaar by die Gauteng Robotics Challenge, wat by Hoërskool Waterkloof in Pretoria aangebied is.
Die kompetisie was vir leerders vanaf grade vier tot 10, en 51 spanne van skole regoor Pretoria het deelgeneem.
Rayties het twee deelnemende spanne gehad. Die Techno Sisters het bestaan uit die spanleier, Wilmarié Fourie, saam met Elmary Coetzee, Leonie Geering en Taria Coetzee.
Die Rayties se Techno Brothers-span is gelei deur Wikus Myburgh, met Nathan Silver en Zander Heymans as spanlede. Albei Rayties-spanne het goue status ontvang met robotspel-tellings van meer as 100 punte per ronde.
Die Techno Brothers het met die Samewerkingsprys weggestap. Die Raytie-robotikaleerlinge werk hard aan hul robotika-vaardighede. Hulle oefen elke Woensdae- en Vrydae van 14:00 tot 16:00.
Hulle maak nou gereed vir die volgende robotikakompetisie, die First Lego League, wat op 25 Oktober by UNISA gaan plaasvind.
Tydens dié kompetisie sal daar ook meer as 50 spanne van regoor Gauteng meeding.
