Cullinan-bergfietsryer maak sy dorp en skool trots
“Ten spyte van ysige temperature wat soms tot -4°C gedaal het, moegheid en ’n propvol program, het Johan bo uitdagende toestande uitgestyg.”
Johan van Eeden het groot trots vir sy gemeenskap gebring toe hy van 4 tot 6 Julie Gauteng verteenwoordig het by die Suid-Afrikaanse 2025 Bergfietskampioenskap, wat deel vorm van die Karkloof Youth Festival.
Die 10-jarige Johan is ’n inwoner van Cullinan en ’n leerder aan Laerskool Witpoort.
“Ten spyte van ysige temperature wat soms tot -4°C gedaal het, moegheid en ’n propvol program, het Johan bo uitdagende toestande uitgestyg,” het sy ma, Elrika van Eeden, vertel.
Op die eerste dag van die kompetisie het Johan aan ’n tydtoets deelgeneem waarin hy met ’n tyd van 1:37 derde geëindig het – slegs een sekonde agter die wenner.
Hy het ook aan die XCM-kampioenskap deelgeneem en daarin ’n tweede plek verower. Op die tweede dag het Johan sy eerste Enduro-wedren aangedurf as deel van die Suid-Afrikaanse kampioenskap.
“Enduro verg ’n heel ander tegniek, en alhoewel dit sy eerste uithouwedren was, het hy steeds daarin geslaag om 13de te eindig in ’n tyd van 11:02,” het Elrika gesê.
Die derde dag was Johan terug in aksie op sy fiets tydens die XCM SA-kampioenskap, waar hy weer ’n algehele tweede plek behaal het, net twee sekondes agter die wenner.
“Dit was ’n besonder uitdagende uithouroete met groot hoogtewins en baie hoë tempo’s – dit was beslis een van die moeilikste wedrenne van die naweek,” het Elrika bygevoeg.
Johan se deursettingsvermoë en indrukwekkende prestasies het aan hom die titel van algehele wenner in die ‘Nipper’-seunsafdeling van die 2025 SA Jeugkampioenskap besorg.
