Suurlemoen-uitdaging bring soete samesyn op Cullinan

Vroue van Cullinan en Rayton het op 16 Augustus, te midde van die sitrusseisoen, ’n suurlemoen-uitdaging aangebied.

Die raadslid vir Wyk 100, Johannes Bekker, het die geleentheid bygewoon. Hy het vertel dat die tafel oorlaai was met kreatiewe inskrywings, waaronder suurlemoenparfait, suurlemoenbrosbrood, mini-oliebolle, ’n Italiaanse suurlemoenkoek, suurlemoenkoekies met pistasieneute, ’n sitrusmalvalekkertert en selfs geurige suurlemoenblatjang.

Elke item het sy eie storie en geurprofiel gehad, en deelnemers het dit trots uitgestal. In plaas van ’n tradisionele beoordelingspaneel, het die hele gemeenskap oor die wenner besluit.

“Almal kon aan die verskillende items proe en daarna ’n goue plakker by hul gunsteling plaas. Die deelnemer met die meeste plakkers is uiteindelik as die wenner aangekondig,” het Bekker verduidelik.

Naomi du Plessis se geurige suurlemoenlekkerny het die meeste goue plakkers ontvang en haar die wenplek besorg. Sy is met ’n spesiaal ontwerpte Jenna Clifford-beker beloon.

Bekker het die dag as ’n groot sukses beskryf.

“Hierdie uitdaging bewys dat kos en kreatiwiteit mense kan saambind. Cullinan en Rayton is ryk gemeenskappe met hope talent, en ek is trots om te sien hoe ’n eenvoudige suurlemoen ons almal byeenbring. Ek hoop hierdie dag word ’n gereelde geleentheid waar alledaagse bestanddele kan uitblink,” het hy gesê.